Back to Basics - Balik Kampung

FRV— Faith Revival Village, boos do Ongilis ih kikomozon do Kampung Iman Lomunu.

Boos tokou magak-tagak—iho no oh o’ongou tokou tomoimo do kovuhai mantad kabang do mohohoing do tinau tokou.

Nokuo tu au a’anangan iti sukod vagu do mokinoboos toi momoguno do boos sondi. Kiva do pipio oh sabap tapi kogumuan do au apagat do balajar nga sabap-sabap ngaavi dihia a’ait id siibo.

Au abazagan do momoguno id hamin sondi sabap do kogumuan oh pibaasan do sukod vagu nga id boos do Malazu om Ongilis.

Kaban boos do Kadazan nga au kogonop sabap ogumu ih nadadi toi nokito doid vinoun baino nga aiso do boos notinagas do popohombus toi popointahang do nunu oh komozon toi pomungaan ngaavi dii.

Nung modsupu do boos vagu nga mositi do ookunan om gunoon do tomoimo do moi do asanganu om olotian do kogumuan do tinau tokou: iti momoguno do timpu do ahaid om balanja togumu.

Sabap do sinidau do kotundaan doid pomogunan do pipio oh danau, isai nopo ih abaa do boos suvai miaga do Ongilis, Sina, Kaling/Hindi, Malazu om susuvai po, kaanu do momogusa toi gumusa do tinau suvai doid danau do pulitik, science, ekonomi, agama om susuvai po; dadi okuangan nogi do timpu om kousinan, sabap au nogi kaanu do mogium toi popoikot do pukodou om koumatan ih gunoon do masi tikid tadau.

Aiso do kagazat kozo do ginavo dioho (sukod vagu) do mimpaagat do misingiho toi mokinoboos do boos dioho sosondi. Nunu oh tadadi do oikot touvi ? Mimang do opunso iti boos do Kadazan. Nung nopunso iti boos do Kadazan, komozon nopo nga nopunso nogi oh tinau do Kadazan.

HANSANON DO MANAMPASI!

Aiso do suvai do kaanu do manampasi do boos do Kadazan; nung bangsa do Kadazan au mimpaagat do manampasi, isai po vagu.

Nga kivaa dati do kahansanan om iti au mikot mantad sukod vagu do Kadazan sondii nga mikot mantad ih tuhun do songosuvazan ih agazat oh ginavo dioho do mimpaagat do minsingiho toi mokinoboos do boos Kadazan sabap do dumadi izioho do momogun do Sabah. Ondomo no mai!